Það var líf og fjör á Alþjóðlega móðurmálsdeginum í aðalsafni Borgarbókasafnsins þriðjudaginn 21. febrúar. Þar komu saman börn og fullorðnir til að fagna fjölbreytileikanum og þeim ólíku tungumálum sem fólk sem búsett er hér á landi á að móðurmáli. Farið var í leiki og sögur sagðar á nokkrum tungumálum, móðurmálsfélög og fleiri aðilar kynntu sig og starfsemi sína og hægt var að fá „lifandi tungumál“ að láni. Vigdís Finnbogadóttir, fyrrverandi forseti Íslands og velgjörðarsendiherra tungumála Menningarmálastofnunar Sameinuðu þjóðanna (UNESCO), var heiðursgestur samkomunnar.
Það var sérstaklega ánægjulegt hve margt ungt fólk af erlendum eða blönduðum uppruna tók þátt í dagskránni og deildi sinni reynslu með öðrum þátttakendum. Meðal þeirra tungumála sem hægt var að fræðast um á móðurmálsdagskránni voru japanska, litháíska, albanska, ítalska, franska, kínverska, tékkneska og kreól.
Borgarbókasafn stóð fyrir dagskránni í samvinnu við félagið Móðurmál, Stofnun Vigdísar Finnbogadóttur í erlendum málum, Skóla- og frístundasvið borgarinnar, Tungmalatorg.is og Reykjavík Bókmenntaborg UNESCO.
